1Pe 5 | MED | STEP | Na ndi, manga wingti rᵾp wu mbᵾ kᵾn, ik ei mel nᵾmp mundunt. Na kongun tenda ei nga etᵾp mor. Na nga mong raⱡ ndi, Kraist mindil nurum uⱡ mbᵾ kᵾndᵾr, wote ui tila elim nga rᵾⱡang kai omba mot nᵾm ila, na ruk ting ila muⱡimp ku. Ei nga, na enim kᵾn ik ei mel nᵾmp ekit ndup nᵾnt.

1 Peter 5

Enim Rᵾp Wu Mbᵾ Ndi, Got Nga Wamp Mbᵾ Rᵾp Itᵾi!

1 Na ndi, manga wingti rᵾp wu mbᵾ kᵾn, ik ei mel nᵾmp mundunt. Na kongun tenda ei nga etᵾp mor. Na nga mong raⱡ ndi, Kraist mindil nurum uⱡ mbᵾ kᵾndᵾr, wote ui tila elim nga rᵾⱡang kai omba mot nᵾm ila, na ruk ting ila muⱡimp ku. Ei nga, na enim kᵾn ik ei mel nᵾmp ekit ndup nᵾnt. 2 Enim sipsip rᵾp wu mbᵾ mel molk, Got nga wamp enim nga ki ila tinditim mbᵾ, elim nga numan pᵾtᵾm ei mel, pila kila nᵾk rᵾp itᵾi! Kongun etᵾk kᵾn, mel ti timin nᵾk, iti nᵾtᵾi mon! Uⱡ ei kelik, numan kai pendᵾk, kongun ei itmin nᵾk itᵾi. 3 Enim wu nuim mel ralk, Got nga wamp enim nga ki ila tinditim kᵾⱡ, tᵾk mana nduk kᵾni nᵾkᵾnᵾi! Ei mon! Enim ndi, wamp mbᵾ uⱡ iting mbᵾ mel, enim uⱡ mbᵾ, kuimbal molk etᵾk, ora ndangina iteing. 4 Wote Sipsip Rᵾp Wu Nuim Mumuk ei, wote omba, pena ila pem ei kᵾn, enim mbi ou tangina, wote wu nuim mumuk mbᵾ nga peng wᵾna tᵾpa pakᵾmba ei, ping nui nanᵾmba.

Tᵾndᵾn Mep Mana Mbun Numan Tenda Pilamin

5 Uⱡ ei mel ku, enim wu kang wu mbᵾ ndi pilik, enim nga rᵾp wu mbᵾ nga mana orunga muⱡᵾi! Enim ndi, en enim nga mul orunga mana nduk, ti ndi ti nga kongun kindmant indᵾi! Got nga ik kat rorung kᵾⱡ ndi, ei mel nᵾtᵾm,

“Got ndi, numan meka rui kandᵾk tᵾtmin wamp mbᵾ, ropa mana ndurum, wote numan koma ti kandᵾk tᵾtmin wamp mbᵾ, elim ndi, kont kuⱡpa poⱡ tᵾtᵾm,” nᵾtᵾm.
6 Enim ndi, en enim nga numan orunga mana nduk, Got nga ki ronduⱡ petᵾm ei nga mana orunga muⱡᵾi! Ei nga, elim nga ui kai pem tila enim oⱡa tᵾmba. 7 Enim nga numan ou ndupa pᵾnmin uⱡ mbᵾ, Got elim kᵾn nguk ruk ndᵾi. Nambuⱡ emel, elim ndi, enim rᵾp etᵾm.

8 Enim nga numan orunga, tᵾk kun mundᵾk, tᵾk mendᵾk pilik mint muⱡᵾi! Enim nga el rui wu Seitan ei, wamp mat kandᵾp tᵾp nuimp nimba, kui laiyon na ni mel, kuimp mepa andpa mint morum. 9 Enim nga mondpa pili orunga ronduⱡ pangga molk, el rui wu kit ei, rok ekit ndᵾi! Nambuⱡ emel, enim pᵾnmᵾn ei, mondpa pili wamp mat, mᵾi kᵾmp mbila pora, mbun mindil enim tᵾnmin ei nga, kandᵾk tᵾk ku mormin.

10 Wamp pol ti uⱡ mbᵾ, Got elim kᵾn tetᵾm. Elim ndi, enim wi ropa, Kraist kᵾn ruk titim ei ndi, enim rᵾⱡang kai uⱡ nga kᵾnt nga kont tetᵾm ei, teing nimba itim. Ei nga, enim ui onunga kᵾⱡ ila, mindil nangina, wote enim etpa kai mondpa, tᵾpa kun mundpa, etpa ronduⱡ mundᵾmba. 11 Got kᵾn uⱡ ronduⱡ pi mbᵾ nga minal, uⱡ nga kᵾnt nga tepa mint purum! Ei kupa.

Rawe Ik Kᵾⱡ

12 Sailas, na ndi tᵾp, na nga ᵾngᵾn kai mondᵾr nᵾmp pᵾt ei ndi, na tᵾpa rapundᵾⱡnga, mon koⱡmung kᵾⱡ rop, enim kᵾn ngont. Na nga numan ei ndi, enim nᵾmp ronduⱡ ngump, wote nᵾmp ekit ndup kᵾn, ik nᵾnt mbᵾ, Got nga wamp poⱡ tᵾpa kont kurum uⱡ kupa ei. Got nga wamp poⱡ ti uⱡ nᵾnt ila, ronduⱡ mundᵾk muⱡᵾi! 13 Bapilon kona ila rapa tenda wamp kᵾⱡ, Got ndi, enim kᵾn tᵾpa kup etpa mbi ropa titim ei ndi, enim rawe ik kai mbᵾ nimba mundnᵾm. Wote, na nga kangᵾm kang Mak ndi, rawe ik kai mbᵾ nimba mundnᵾm ku. 14 Ana aiyamᵾn mbᵾ kᵾn pora, rawe etᵾk, ik kai mbᵾ nᵾk mondpa pili wamp nga, wamp numan ngui uⱡ ei etᵾk muⱡᵾi! Enim Kraist kᵾn mormin wamp mbᵾ, moⱡpa kundi uⱡ mbᵾ, enim kᵾn kan piyangga!